دسته‌ها
گردآوری

نمونه اشعار شهریار

چوخلار اینجیکدی کی٬ سن اونلارا ناز ایله میسن
من ده اینجیک کی٬ منیم نازیمی آز ایله میسن
ائتمیسن نازی بو ویرانه کونولده سلطان
ائوین آباد اولا٬ درویشه نیاز ایله میسن
هر باخشدا چالیبان کیپریگی مضراب کیمی
بیر قولاق وئر٬ بو سینیق قلبی نه ساز ایله میسن؟
باشدان آچ یایلیغی٬ افشان ائله سوسن ـ سنبل
سن بیزیم بایراممیز سان قیشی یاز ایله میسن
سن گون اول٬ قوی غمیمیز داغدا قار اولسون٬ اریسین
منیم آنجاق ایشیمی سوز و گداز ایله میسن
من بو معناده غزل یازمالی حالیم یوخودی
سن جوجوق تک قوجانی فرفره باز٬ ایله میسن
کاکلی باشدا بوروب باغلامیسان تاج کیمی
او قیزیل ساچدان اونا٬ گوللی قوتاز ایله میسن
سینه بیر دشت مغان دیر٬ قوزی یان ـ یانه یاتیب
منیم آغلار گوزومی٬ اوردا آراز ایله میسن
بو گوزلیک کی جهاندا سنه وئرمیش تانری
هر قدر ناز ائله سن ایله٬ کی آز ایله میسن
منی بو سوز یله آتدین٬ آرالاندین بیلیرم
آرانی بیر پارا نامردیله ساز ایله میسن
دستماز ایله دیگین چشمه٬ مسیحا قانی دیر
بیلمیرم هانسی کلیساده نماز ایله میسن؟
من «عشیران» اوخوسام٬ پنجه «عراق» اوسته گزه ر
گوزلیم٬ «ترک» اولالی٬ ترک «حجاز» ایله میسن
تازا شاعر٬ بوده نیز هر نه باخرسان دیبی یوخ
چوخ اوزاتسان بوغازی٬ أورده گی قاز ایله میسن
بسکه زلف و خط و خالین قوپالاغین گؤتدون
زلفعلی نین باشینی آزقالا دار ایله میسن
گل! منیم ایسته دیگیم کعبه ییخلماز٬ اوجالار
باشدادا کژ گئده سن٬ دیبده تراز ایله میسن
خط و خالیندن آلیب مشقیمی قرآن یازارام
بو حقیقت له منی٬ اهل مجاز ایله میسن
منی٬ دان اولدوزی٬ سن یاخشی تانیرسان که سحر
افقی خلوت ائدیب راز و نیاز ایله میسن
«شهریار» ین داغلیب٬ داغدا داشا دالدالانیب
ئوزون انصاف ایله٬ محمودی ایاز ایله میسن

اشتراک گذاری:
0 0 رای ها
امتیازدهی به مقاله
اشتراک در
اطلاع از
guest
0 نظرات
بازخورد (Feedback) های اینلاین
مشاهده همه دیدگاه ها
0
افکار شما را دوست داریم، لطفا نظر دهید.x